"Terrorkrigen" gjeld olje!

Krig er terror mot sivile. For 100 år sidan var dei fleste krigsoffera soldatar. I dag er dei fleste offera sivile, i Afghanistan og Irak, slik dei var i tvillingtårna til World Trade Center i New York 11. september 2001.

Krig er vidareføring av politikk med andre middel ­ ikkje handling utafor politikken. Krig og terror er aldri "kamp mellom det gode og det vonde", eller det gode sin kamp mot "vondskapens akse" som George W. Bush elskar å seie.

Nesten all transport i lufta, til lands og til sjøs krev bruk av olje eller gass. Dei fleste kraftverka har olje, gass eller kol som energikjelde. Dei forsyner fabrikkane, forretningane, bankane, kontora og bustadane med elektrisitet. Inga vare er meir strategisk enn petroleum!

Cappelens verdsatlas fortel at råolje står for 45,6 % av energiforsyninga i verda, naturgass står for 21,4 %, steinkol og brunkol 29,4 %, mens vasskraft og kjernekraft til saman dekker 3,6 %. Altså: petroleumskjeldene leverer 67 % av all energi i verda. Og verdas største (over-)forbrukar av energi er USA med 20-25 % av det heile.

"Terrorkrigen" gjeld olje- og gasskjeldene. Krig gjeld sjeldan religion, men religion blir brukt til å fylke folk bak seg i krig. Derfor heiter USA sitt politiske mål ikkje petroleumskjeldene i Midt-Austen og i Sentral-Asia, men islamske terroristar. Fiendebildet blir personifisert som Saddam, Osama og Mulla Omar og teikna som islamsk terror (mot kristendom og jødedom) nettopp fordi 65 % av alle petroleumsressursar i verda ligg i islamske land med Irak i sentrum. Desse landa står i dag for "berre" 30 % av verdsproduksjonen av petroleum. Dermed aukar den islamske verda sin del av oljereservane etter kvart som ressursane i Nordsjøen og på og ved det amerikanske kontinentet (Texas, Mexico og Venezuela m.v.) blir tappa ned.

Dei største petroleumsreservane ligg på den arabiske halvøya, i Iran, Sør-Russland og i området frå Kaspihavet til grensa mot Kina. I heile dette området er islam folkereligion. Tidlegare var dei sentralasiatiske republikkane delar av Sovjetunionen. Då var det i USA si interesse å trene, finansiere og bygge opp Osama bin Laden og Al Qaida som "reiskap" mot rivalen Sovjet i Afghanistan, nettopp for å sikre fotfeste i og rundt petroleumskjeldene.

Vi har lite kunnskap om banda mellom Al Qaida og terrorhandlingane 11. september 2001. Vi veit at dei 19 terroristane som kapra flya og førte dei inn i Word Trade Center og Pentagon var frå Saudi-Arabia og Egypt, og registrerte som studentar i USA. Ingen var frå Afghanistan eller Irak. Etter krigen mot Irak i 1990 (og deretter 12 års britisk og amerikansk bombing av "flyforbodssoner" i Irak nesten kvar veke) og etter snart 6 tiår med israelsk fordriving av det palestinske folket, finst det millionar av islamsk ungdom som ser på USA og Israel som "vond" fiende og okkupant av heilag jord. Ikkje berre har USA vore garantisten for eit av verdas mest reaksjonære og brutale regime (Saudi-Arabia) gjennom meir enn 50 år, men USA har finansiert og væpna Israel (ein stat som aldri har brydd seg om å følgje FN-resolusjonar som kravde tilbaketrekking frå okkupert land), begge delane for å sikre kontroll med energikjeldene på og ved den arabiske halvøya.

Saddam var USA sin mann så lenge han førte ein barbarisk krig mot eit sjølvstendig, men USA-fiendtleg Iran. Problemet med Saddam er ikkje at han er ein brutal diktator (noko han utan tvil er), men at han ikkje lenger er USA sin mann i oljeland. Derfor har USA og England i 12 år terrorisert folket i Irak med ein lågintensiv bombekrig og vareboikott som har tatt livet av minst 1 million sivile etter "ørkenstormen" til pappa Bush.

USA har parkert FN og sett seg føre å omforme det politiske kartet over Midt-Austen og Sentral-Asia i sitt bilde. Det står på ingen måte om kamp mot terror, kamp for demokrati eller kamp for å fjerne masseøydeleggingsvåpen. Kampen gjeld kontrollen med dei største petroleumsressursane i verda ­ og den kampen blir ført med alle middel, om "nødvendig" med "masseøydeleggingsvåpen"! Det vil vere ei skam og ein tragedie om Noreg skulle bli med som våpendragar for den internasjonale oljekapitalen i ein imperialistisk krig mot folk og land i ein annan verdsdel! Vi ville bli herrefolk ­ og herrefolk har alltid, og fortener alltid å ha, farlege fiendar.